அனைத்து போலீஸ் நிலையங்களிலும் சிசிடிவி கேமரா

அனைத்து போலீஸ் நிலையங்களிலும் சிசிடிவி கேமரா பொருத்த வேண்டும் என்று சுப்ரீம் கோர்ட் உத்தரவு பிறப்பித்துள்ளது.

பஞ்சாப் மாநிலத்தில் விசாரணைக் கைதி உயிரிழந்த விவகாரம் தொடர்பான வழக்கை சுப்ரீம் கோர்ட் நீதிபதிகள் கே.எம்.ஜோசப், ரோஹிங்டன் நாரிமன், அனிருத்தா போஸ் அமர்வு விசாரித்து கடந்த செவ்வாய்க்கிழமை முக்கிய உத்தரவைப் பிறப்பித்தது. 

“நாடு முழுவதும் அனைத்து போலீஸ் நிலையங்கள், சிபிஐ, தேசிய புலனாய்வு அமைப்பு (என்ஐஏ), அமலாக்கத் துறை, தேசிய போதைப்பொருள் தடுப்புத் துறை, நிதி புலனாய்வு துறை, தீவிர மோசடிகளை விசாரிக்கும் புலனாய்வு குழு (எஸ்எப்ஐஓ) மற்றும் இதர புலனாய்வு அமைப்புகளின் அலுவலகங்களில் சிசிடிவி கேமராக்களை கண்டிப்பாக பொருத்த வேண்டும். இதற்கு தேவையான நடவடிக்கைகளை மத்திய, மாநில அரசுகள் எடுக்க வேண்டும்.

இரவிலும் காட்சிகள் தெளிவாக பதிவாகும் சிசிடிவி கேமராக்களையே பொருத்த வேண்டும். ஆடியோ பதிவும் தெளிவாக இருக்க வேண்டும். குறைந்தபட்சம் 18 மாதங்கள் வரையிலான பதிவுகளை சேமிக்கும் வசதி இருக்க வேண்டும்.

போலீஸ் நிலையம் அல்லது புலனாய்வு அலுவலகத்தின் நுழைவு, வெளியேறும் வாயில்கள், பிரதான வாயில், அலுவலகத்தின் வெளிப்புறம், பின்புறம், லாக்-அப் அறைகள், வரவேற்பறை, இன்ஸ்பெக்டர் அறை, சப்-இன்ஸ்பெக்டர் அறை, கழிவறையின் வெளிப்பகுதி உள்ளிட்ட பகுதிகளில் சிசிடிவி கேமராக்கள் பொருத்தப்பட வேண்டும். 

சிசிடிவி கேமரா பதிவுகளை ஆய்வு செய்ய சுதந்திரமாக செயல்படும் குழுவை நியமிக்க வேண்டும். அந்த குழு அனைத்து போலீஸ் நிலையங்களின் சிசிடிவி கேமராக்களின் பதிவுகளை ஆய்வு செய்து குறிப்பிட்ட கால இடைவெளியில் அறிக்கை வெளியிட வேண்டும்.

போலீஸ் நிலையங்களில் விசாரணை கைதி உயிரிழப்பு, படுகாயம் அடைவது உள்ளிட்டவை குறித்த புகார்களை விசாரிக்க ஒவ்வொரு மாவட்டத்திலும் மனித உரிமை நீதிமன்றங்களை அமைக்க வேண்டும்” என்று சுப்ரீம் கோர்ட் உத்தரவிட்டுள்ளது.

Leave a Reply

Your email address will not be published. Required fields are marked *