மருந்துகளை பெரிய எழுத்தில் எழுத வேண்டும்.. டாக்டர்களுக்கு ஒடிசா ஐகோர்ட் கண்டிப்பு

நோயாளிகளுக்கு மருந்துகளை பரிந்துரைக்கும்போது ஆங்கிலத்தில் தெளிவான கையெழுத்தில், பெரிய எழுத்துகளில் டாக்டர்கள் எழுத வேண்டும் என்று இந்திய மருத்துவ கவுன்சில் உத்தரவிட்டுள்ளது. ஆனால் பெரும்பாலான டாக்டர்கள், மருந்துகளின் பெயர்களை தெளிவாக எழுதுவதில்லை.

அவர்களின் கையெழுத்து கிறுக்கலாக உள்ளது. டாக்டர்களின் கையெழுத்து புரியாமல் மருந்து கடைகளில் மருந்துகளை மாற்றிக் கொடுத்து நோயாளிகள் பாதிக்கப்பட்ட சம்பவங்கள் ஏராளம் உள்ளன.
இந்த விவகாரம் தொடர்பாக கிருஷ்ணா படா மண்டல் என்பவர் ஒடிசா ஐகோர்ட்டில் வழக்கு தொடர்ந்தார்.

ஒடிசா உயர் நீதிமன்ற வளாகம்.
ஒடிசா உயர் நீதிமன்ற வளாகம்.

அதில், “எனது மனைவியை சிகிச்சைக்காக டாக்டரிடம் அழைத்துச் சென்றேன். அவர் ஆங்கிலத்தில் எழுதி கொடுத்த மருந்துகளின் பெயர்கள் தெளிவாக இல்லை. ஏதாவது தவறு நேர்ந்தால் யார் பொறுப்பு ஏற்பார்கள்” என்று கேள்வி எழுப்பியிருந்தார். இவ்வழக்கை நீதிபதி பனிகிராகி தலைமையிலான அமர்வு விசாரித்தது.


“மருந்து சீட்டு, பிரேத பரிசோதனை அறிக்கை, காயங்கள் குறித்த பரிசோதனை அறிக்கை உள்ளிட்டவற்றை டாக்டர்கள் ஆங்கிலத்தில் தெளிவான கையெழுத்தில் எழுத வேண்டும். குறிப்பாக நோயாளிகளுக்கு பரிந்துரைக்கும் மருந்துகளின் பெயர்களை தெளிவான கையெழுத்தில், பெரிய எழுத்தில் எழுத வேண்டும்.


இது டிஜிட்டல் உலகம். எலெக்ட்ரானிக் சாதனங்கள் வாயிலாக மருந்துகளின் தெளிவான அச்சுப் பிரதியை நோயாளிகளுக்கு வழங்கலாம். இதுதொடர்பாக ஒடிசா தலைமைச் செயலாளர் உரிய நடவடிக்கைகளை எடுக்க வேண்டும்” என்று நீதிபதிகள் உத்தரவிட்டனர்.

Leave a Reply

Your email address will not be published. Required fields are marked *