சீனாவில் 12-வது மாடி ஜன்னல் கம்பியில் தலை சிக்கி அந்தரத்தில் தொங்கிய 3 வயது குழந்தை: ஸ்டூல் கொடுத்துத் தாங்கிப் பிடித்துக் காப்பாற்றிய குடியிருப்புவாசிகள்
பெய்ஜிங், அக். 25: சீனாவின் புஜியான் (Fujian) மாகாணத்தில் உள்ள ஜாங்பிங் (Zhangping) நகரில், அடுக்குமாடிக் குடியிருப்பின் 12-வது மாடி ஜன்னல் கம்பியில் தலை சிக்கி அந்தரத்தில் தொங்கிய 3 வயது சிறுமியை அண்டை வீட்டாரும் தீயணைப்புத் துறையினரும் துரிதமாகச் செயல்பட்டுப் பத்திரமாக மீட்டுள்ளனர்.
தனிமையில் இருந்த குழந்தை சிக்கிய திகில் நிமிடங்கள்
கடந்த அக்டோபர் 17-ம் தேதி காலை 7.48 மணியளவில் இச்சம்பவம் நிகழ்ந்தது. சிறுமியின் தந்தை பணிக்குச் சென்றிருந்த நிலையில், குழந்தை ஆழ்ந்த உறக்கத்தில் இருப்பதாகக் கருதிய தாய், வீட்டைப் பூட்டிவிட்டு அருகிலுள்ள கடைக்கு மளிகைப் பொருட்கள் வாங்கச் சென்றிருந்தார். அப்போது தூக்கத்திலிருந்து விழித்த 3 வயது சிறுமி, பால்கனி ஜன்னல் அருகே ஏறியபோது பாதுகாப்புக் கம்பிகளுக்கு (Safety Grille) இடையே உடல் நழுவி வெளியே சென்றதில், அவளது தலை மட்டும் கம்பிகளுக்கு இடையே சிக்கிக்கொண்டது. இரு கைகளாலும் கம்பியைப் பிடித்தபடி 12-வது மாடியில் அந்தரத்தில் தொங்கிய சிறுமியைக் கண்டு குடியிருப்புவாசிகள் அதிர்ச்சியடைந்தனர்.
11-வது மாடியிலிருந்து ஸ்டூல் கொடுத்துத் தாங்கிய குடியிருப்புவாசிகள்
குடியிருப்பின் தகவல் தொடர்புக் குழுவில் (Group Chat) புகைப்படம் பகிரப்பட்டவுடன், குடியிருப்பின் பாதுகாப்புப் பணியாளர்களும் மேலாண்மை ஊழியர்களும் உடனடியாக 11-வது மாடியில் உள்ள வீட்டுக்குள் விரைந்தனர். அங்கிருந்த இரண்டு இளைஞர்கள் தனித்தனி ஜன்னல்கள் வழியாக வெளியே குனிந்து, சிறுமியின் கால்கள் மற்றும் உடலைத் தாங்கிப் பிடிக்கும் வகையில் ஒரு ஸ்டூலை (Stool) அடியில் பிடித்துக் கொண்டனர். இதனால் சிறுமியின் கழுத்தில் ஏற்படும் அழுத்தம் தடுக்கப்பட்டது.
சில நிமிடங்களில் சம்பவ இடத்திற்கு விரைந்து வந்த தீயணைப்பு வீரர்கள், 12-வது மாடிக்குள் நுழைந்து பாதுகாப்புக் கம்பிகளை அகற்றி சிறுமியைப் பத்திரமாக மேலே இழுத்து மீட்டனர். மருத்துவப் பரிசோதனையில் சிறுமிக்கு எவ்விதக் காயமும் ஏற்படவில்லை என்பது உறுதி செய்யப்பட்டது.
