கடலூர் அருகே சுங்கச்சாவடியைக் கடக்க முயன்ற நபர் தலையில் விழுந்த தானியங்கி தடுப்புக் கம்பி: படுகாயமடைந்தவர் மருத்துவமனையில் அனுமதி
கடலூர், அக். 25: கடலூர் அருகே தேசிய நெடுஞ்சாலை சுங்கச்சாவடியை நடந்து கடக்க முயன்ற நபர் மீது வாகனங்களை நிறுத்தும் தானியங்கி தடுப்புக் கம்பி (Automatic Boom Barrier) திடீரென வேகமாக இறங்கித் தாக்கியதில், அவர் பலத்த காயமடைந்து மருத்துவமனையில் அனுமதிக்கப்பட்டுள்ளார்.
கொத்தட்டை சுங்கச்சாவடியில் நிகழ்ந்த விபத்து
கடலூர் – சிதம்பரம் தேசிய நெடுஞ்சாலையில் கொத்தட்டை சுங்கச்சாவடி செயல்பட்டு வருகிறது. நாள்தோறும் ஆயிரக்கணக்கான வாகனங்கள் கடந்து செல்லும் இந்தச் சுங்கச்சாவடியின் வழியாகக் காலை நேரத்தில் நபர் ஒருவர் நடந்து சென்று கொண்டிருந்தார். அப்போது வாகனங்கள் செல்வதற்காக மேலே உயர்த்தப்பட்டிருந்த தானியங்கி தடுப்புக் கம்பி, எதிர்பாராதவிதமாக அந்த நபரின் தலையில் மிக வேகமாக இறங்கித் தாக்கியது.
தார்ச்சாலையில் சுருண்டு விழுந்த நபர் மீட்பு
தலையில் பலத்த அடிபட்ட அந்த நபர் கண் இமைக்கும் நேரத்தில் நிலைதடுமாறித் தார்ச்சாலையில் சுருண்டு விழுந்தார். இதைக் கண்டு அதிர்ச்சியடைந்த சுங்கச்சாவடி ஊழியர்களும் அங்கிருந்த பொதுமக்களும் உடனடியாக ஓடிவந்து அவரை மீட்டு, அருகில் உள்ள மருத்துவமனைக்குச் சிகிச்சைக்காக அனுப்பி வைத்தனர். அங்கு அவருக்குத் தீவிர சிகிச்சை அளிக்கப்பட்டு வருகிறது. சுங்கச்சாவடிப் பாதைகளில் பாதசாரிகளின் பாதுகாப்பை உறுதி செய்ய வேண்டியதன் அவசியத்தை இச்சம்பவத்தின் சிசிடிவி காட்சிகள் வெளிச்சம் போட்டுக் காட்டியுள்ளன.
