புதுடெல்லி, அக். 25: உயர்கல்வி பயிலும் மாணவர்கள் தங்களது சொந்தச் செலவுகளுக்காகப் பெற்றோரைச் சார்ந்திராமல் பகுதிநேரப் பணிகளில் ஈடுபடுவது அதிகரித்து வரும் நிலையில், சட்டப் படிப்பு (LLB) பயின்று வரும் மாணவர் ஒருவர் ‘பிளிங்கிட்’ (Blinkit) நிறுவனத்தில் பகுதிநேர டெலிவரிப் பணியில் சேர்ந்து தனது முதல் நாள் வருமானக் கணக்கைப் பகிர்ந்துள்ள பதிவு சமூக வலைதளங்களில் பாராட்டுகளைப் பெற்றுள்ளது.
6.30 மணி நேரத்தில் 19 ஆர்டர்கள் விநியோகம்
காவல் தேசாய் (Kaval Desai) என்ற சட்டக் கல்லூரி மாணவர் தனது எக்ஸ் (X) தளப் பக்கத்தில் முதல் நாள் பணி அனுபவத்தை வெளியிட்டுள்ளார். முதலில் 2 மணி நேரம் பணியாற்றி 6 ஆர்டர்கள் மூலம் ரூ.149 ஈட்டிய அவர், நாள் முடிவில் மொத்தம் 6 மணி நேரம் 30 நிமிடங்கள் பணியாற்றி 51 கிலோமீட்டர் தூரம் பயணித்து 19 ஆர்டர்களை வாடிக்கையாளர்களிடம் விநியோகம் செய்துள்ளார்.
பெட்ரோல் செலவு பூஜ்ஜியம்: மொத்த வருமானம் ரூ.608
தனது முதல் நாள் வருமானம் மற்றும் செலவு குறித்து காவல் தேசாய் பகிர்ந்துள்ளதாவது:
“எனது முதன்மைத் துறையான எல்.எல்.பி. சட்டப் படிப்புடன், எனது சொந்தச் செலவுகளைச் சமாளிக்க இந்தப் பகுதிநேரப் பணியைத் தொடங்கியுள்ளேன். முதல் நாளில் 19 ஆர்டர்களை டெலிவரி செய்ததன் மூலம் ஊக்கத்தொகை ரூ.75 உட்பட ரூ.508 மற்றும் இலக்கை எட்டியதற்கான போனஸ் ரூ.100 என மொத்தம் ரூ.608 சம்பாதித்தேன். நான் ‘ஏதர்’ (Ather EV) எலக்ட்ரிக் ஸ்கூட்டர் வைத்திருப்பதால் வீட்டிலேயே சார்ஜ் செய்து கொள்கிறேன்; இதனால் பெட்ரோல் செலவு பூஜ்ஜியம். படிப்பு நேரம் வந்ததாலும் பேட்டரி குறையத் தொடங்கியதாலும் முதல் நாள் பணியை நிறைவு செய்தேன். என்னைப் போன்ற மாணவர்களுக்கு இது ஒரு வரப்பிரசாதம்.”
மேலும், முழுநேரமாக இப்பணியில் ஈடுபடுபவர்கள் வாரத்திற்கு ரூ.8,000 முதல் ரூ.9,000 வரை சம்பாதிப்பதைத் தான் நேரில் பார்த்திருப்பதாகவும், கல்விக்கு இடையூறு இன்றிச் சுயமாகச் சம்பாதிக்க விரும்பும் மாணவர்களுக்கு இத்தகைய பகுதிநேரப் பணி பெரிதும் உதவுவதாகவும் அவர் குறிப்பிட்டுள்ளார்.
